पूर्णपुष्टि, असार १६
उदयपुरको लिम्चुङबुङ गाउँपालिकाले ३५ करोड ५९ लाख ५६ हजारको बजेट सीमा निर्धारण गर्दै सातौं गाउँसभा अधिवेशन हिजो सम्पन्न गरेको छ ।
“सवल भौतिक पूर्वाधारहरुको निर्माण गर्दै शिक्षा तथा स्वास्थ्यमा दिगो लगानीको प्रतिबद्धता–व्यावसायिक कृषि, पर्यटन तथा लघु उद्यममार्फत दिगो विकासको सुनिश्चितता” भन्ने नाराका साथ सोमबार गाउँसभा सम्पन्न गरेको हो । सभाले गौरबका नौं आयोजना छनौट गरेको छ । दुईवर्षभित्रमा गाउँपालिका प्रशासकीय भवन तथा वडा कार्यालयहरुको भवन निर्माण गरी सुलभ सेवा प्रवाह गर्ने लक्ष लिएको छ । त्यस्तै वडा नं. १ र २ मा स्वास्थ्यचौकी भवन निर्माण गर्ने, महेन्द्र मावि बराहा र क्याप्टेन पर्शुराम पद्मा राई उच्च मावि बलम्तामा सदरमुकाम स्तरको शैक्षिक गुणस्तर प्रवा गर्ने, अध्यक्ष कृषि परियोजनामार्फत गाउँपालिकामा व्यवसायिक तथा आधुनिक कृषिको विकास गर्दै आर्थिक समृद्धिको आधार निर्माण गर्ने र एभरेष्ट भ्यूटप दोवाटेडाँडालाई जिल्लाकै उत्कृष्ट पर्यटकीय गन्तब्यको रुपमा विकास गर्ने लक्ष लिएको छ ।
पालिकाले समग्रमा भौतिक पूर्वाधारलाई प्राथमिता दिदै बजेट विनियोजन गरेको छ । पूर्वाधारतर्फ ९ करोड ३० लाख विनियोजन भएको छ । गौरबका नौ आयोजनाका लागि ७ करोड, सामाजिक विकासतर्फ ४ करोड ३७ लाख ५६ हजार बजेट विनियोजन छ । आर्थिक विकासतर्फ २ करोड ३० लाख विनियोजन छ । कोषहरुको व्यवस्थापनका लागि १ करोड ३० लाख, विपद् व्यवस्थापनतर्फ ४५ लाख र संस्थागत विकासतर्फ १५ लाख बजेट विनियोजन भएको छ ।
पाँच वडालाई ४० लाखको दरले बजेट सिलिङ प्रदान गरिएको छ भने प्रत्येक वडामा ५० लाखको ठूलो पूर्वाधार निर्माणका लागि बजेट छुट्याएको छ ।
पालिकाका अध्यक्ष मेजरकुमार राईले निती, कार्यक्रम तथा बजेट प्रस्तुत गर्नुभयो भने पालिकाकी उपाध्यक्ष रमिला राईले बजेट वक्तव्य प्रस्तुत गर्नुभयो ।
गाउँसभा भब्य र सभ्यरुपले सम्पन्न भएको पालिकाका प्रमुख प्रशासकीय अधिकृत टार्जनकुमार लिम्बुले बताउनुभयो ।