पूर्णपुष्टि, जेठ १२ गते ।
रोल्पाको वनमा लागेको डढेलो गाउँ पस्दा दुई घर जलेर नष्ट भएको छ भने एक जना जेष्ठनागरिक घाईते भएका छन् ।
रोल्पा नगरपालिका–१ हरीगातिनाको सामुदायिक वनमा लागेको डढेलो गाउँमा पसेर स्थानीय जितबहादुर बुढा र उनको छोरा नेत्रबहादुर बुढाको घर जलेको प्रहरीले जनाएको छ ।
वनमा लागेको डढेलो नियन्त्रण गर्न छोराहरु वनमा गएका बेला घरमा सल्केको आगोले आँखा नदेख्ने ६५ वर्षीय जेष्ठनागरिक जितबहादुर बुढा गम्भीर घाइते भएको प्रहरीले जनाएको छ । घाइते बुढाको अहिले रोल्पा अस्पताल रेउघामा उपचार भइरहेको छ ।
घर पूर्णरुपमा जलेर नष्ट भएको छ भने जितबहादुरको २ वटा गोरु र १ वटा बाख्रा पनि जलेर मरेको छ ।
सोमबार बिहानदेखि वनमा लागेको आगो स्थानीय, प्रहरी र नेपाली सेनाको सहयोगमा नियन्त्रणको प्रयास गरिरहेको छ ।