पूणर्पुष्टि, भदौ १८
अमेरीकामा आएको आँधी र बाढीमा परि तिन नेपालीको समेत मृत्यु भएको छ । तिन नेपाली एकै परिवारका हुन् । मृत्यु हुने नेपालीहरुमा सोलुखुम्बुको दूधकुण्ड नगरपालिका-२ जुनवेशीका आङ गेलु लामा, उनकी श्रीमती मिङमार शेर्पा र उनीहरूका १९ महिनाका छोरा लोप्साङ लामाको बिहीबार बाढीमा परी मृत्यु भएको युनाइटेड शेर्पा एसोसिएसन अमेरिकाले फेसबुकमार्फत् जानकारी दिइएको छ ।
अमेरिकाको न्युयोर्कमा बस्दै आएका उनिहरुको अमेरिका स्थित आइडा नामक सामुद्रिक आँधीको प्रभावले भएको भीषण वर्षापछि आएको बाढीमा परि मृत्यु भएको हो ।
बाढीमा परी तिन नेपाली सहित ३९ जनाको मृत्यु भएको छ । तीन दिनअघि अमेरिकी राज्य लुजियानामा आइडा आँधी प्रवेश गरेको थियो । उक्त आँधीका कारण लुजियानामा ठूलो भौतिक र मानवीय क्षति भएको थियो ।
न्युयोर्क टाइम्सका अनुसार कमजोर भइसकेको ठानिएको त्यही आँधीको प्रभावले बिहीबार उत्तरपूर्वका न्युयोर्क, न्युजर्सी, पेन्सलभेनिया र कनेक्टिकट राज्यमा अचानक भीषण वर्षा भएको थियो ।
अचानक भएको वर्षाले घरका भुइँतलामा पानी भरिएको थियो भने सडकहरू नदीजस्ता भएका थिए । ज्यान गुमाउनेहरूमा धेरैजसो भुइँतलामा बसेका र सवारी साधन चलाइरहेका मानिसहरू छन् । बाढीमा केही कारहरू बगेका छन् ।