उदयपुर/असोज, ५
नेपालको बिभिन्न पर्यटकीय क्षेत्रलाई प्रवद्र्धन र विकास गर्ने भन्दै आयोजना भएको इन्डस्ट्रि इस्ट टुरिजम् मार्ट २०१९ मा जिल्ला होटल व्यवसायी संघ उदयपुरले पनि उत्साहजनक सहभागीता जनाएको छ ।
शनिवार १ नं प्रदेशको धरान उप–महानगरपालिकामा भएको टुरिजम महोत्सवमा सहभागिता जनाएको हो । जिल्लाबाट होटल व्यवसायी संघ उदयपुरका अध्यक्ष कृष्णकुमार श्रेष्ठसहितको टोलीले सहभागीता जनाएको हो । १ नं प्रदेशको सबै जिल्लाहरु आयोजक समितिको सदस्य समेत रहेर कार्यक्रममा सहभागी रहेको संघका अध्यक्ष श्रेष्ठले बताए ।
१ नं प्रदेशको १४ ओटै जिल्ला र प्रदेश बाहिरको पोखरा, मकवानपुर, चितवन र देश बाहिरबाट, पूर्वी भारत, भुटान र बङगलादेशले पनि सो कार्यक्रममा सहभागी जनाएका थिए । बिषेश गरी १ नं प्रदेशको पर्यटकीय क्षेत्रलाई पहिचान गर्ने र त्यस्ता क्षेत्रलाई अवलोकन गरी तत्काल परिचालनमा ल्याउने भन्दै पर्यटनन महोत्सवको आयोजना गरिएको कार्यक्रम समितिका अध्यक्ष भविन श्रेष्ठले बताए ।
कार्यक्रमको उदेश्य अनुसार उदयपुरले पनि आफ्नो जिल्लाको बिभिन्न पर्यटकीय क्षेत्रहरुको जानकारी महोत्सवमा प्रदर्शन गरेको थियो । जिल्ला भरिरहेका धार्मिक तथा पर्यटकीय स्थलहरु रौता पोखरी, ताप्ली पोखरी, टंकेला गुफा, एभरेष्ट भ्युटावर, महाँकाली मन्दिर, कोशी र्याफटीङ, लगायतका क्षेत्रहरुलाई प्रदर्शन गरेको थियो ।
नेपाल पर्यटन वोर्डको आयोजना, धरान उप–महानगरपालिकाको समायोजन र १ नं प्रदेश सरकारको सहयोगमा धरान स्थित कार्यक्रमको आयोजना भएको थियो ।
कार्यक्रमलाई १ नं प्रदेशको मुख्यमन्त्रि शेरधन राईले उद्घाटन गरेका थिए । कार्यक्रमलाई सम्बोधन गर्दै मन्त्री राईले १ नं प्रदेश देशकै सबैभन्दा बढी पर्यटन योग्य प्रदेश रहेको बताए । १ नं प्रदेशमा हिमाल, तराई, र पहाड सबै भुगोलले छोएको र यहाँ धरै पर्यटनमुखि स्थलहरु रहेको बताए ।
प्रदेशमा १ सय २५ ओटै जातजातिका मानिसहरु बसोवास गर्ने प्रदेश रहेको कारण यस प्रदेशमा बसोवास गर्ने मानिस निकै भाग्यमानि रहेको राईले व्याख्या गरे ।
