पूर्णपुष्टि, साउन १९
बिएड प्रथम वर्षको परीक्षा दिँदै गरेको एक परीक्षार्थी खोटाङमा मृत अवस्थामा भेटिएको छ । रावाबेँसी गाउँपालिका–२ खार्पास्थित रावा क्याम्पस खार्पा परीक्षा केन्द्रबाट बिएड प्रथम वर्षको परीक्षा दिँदै गरेका हलेसी तुवाचुङ नगरपालिका–६ मंगलटारका ४६ वर्षीय शिवराज राई कोठामा मृत भेटिएको हो ।
खार्पास्थित लुकराज श्रेष्ठको घरमा बसेर परीक्षा दिँदै गरेका राई सोमबार बिहान कोठामै मृत फेला परेको रावा क्याम्पसका उपप्राध्यपक गोपाल बस्नेतले बताए ।
राई बेलुकाको खाना खाएर सुतेका थिए, बिहान परीक्षासुरु हुने बेलासम्म नउठेपछि हेर्न जाँदा कोठामा उनी मृत भेटिएको हो । हलेसी तुवाचुङ नगरपालिका–७ महादेवस्थानस्थित हलेसी क्याम्पसमा अध्ययनरत राई परीक्षाका लागि रावा क्याम्पस खार्पा पुगेका थिए । आइतबार राती अवेरसम्म पढेका राई बिहान भने मृत फेला परेका हुन् ।
उनले आफ्नो साथीहरुलाई राती अवेरसम्म पढ्ने र बिहान ढिला उठेको अवस्थामा उठाउन भनेको उपप्राध्यपक बस्नेतले बताए । ‘राती अवेरसम्म पढ्छु, बिहान ढिलो उठे भने उठाउनु है भनेर पढ्न बसेका रहेछन्,’ बस्नेतले भने, ‘बिहान परीक्षा सुरु हुने बेलासम्म पनि नउठेपछि उठाउन जाँदा मृत अवस्थामा फेला परेको हो ।’
राईले तीन वटा विषयको परीक्षा दिइसकेका थिए । सोमबार ऐच्छिक अंग्रेजीको परीक्षा दिने तयारीमा थिए । राईको मृत्युको कारण भने खुलिसकेको छैन । उनले उच्च रक्तचापको औषधी खाइरहेको भटिएको छ । आफन्तको उपस्थितिमा शव उठाएर पोष्टर्माटमका लागि जिल्ला अस्पताल दिक्तेल पठाइएको जिल्ला प्रहरी कार्यालय खोटाङले जनाएको छ ।