पूर्णपुष्टि, कात्तिक ३
नेपाल र ओमानबीच प्रवेशाज्ञा छुट सम्झौतामा हस्तारक्षर भएको छ । नेपाली तथा ओमानी कूटनीतिक, विशेष, सेवाकालीन तथा सरकारी पासपोर्ट वाहकलाई एकार्काका देशमा प्रवेशाज्ञा छुटसम्बन्धी सम्झौतामा हस्ताक्षर भएको ओमानमा रहेको नेपाली दूतावासले जनाएको छ ।
ओमानको परराष्ट्र मन्त्रालयमा सोमबार सम्झौतामा हस्ताक्षर भएको थियो । सम्झौतानुरूप अब कूटनीतिक, विशेष, सेवाकालीन तथा सरकारी पासपोर्ट वाहकले एकअर्काका देशमा प्रत्येक पटक प्रवेश गरेका मितिदेखि ९० दिनसम्म प्रवेशाज्ञा नलिइकन प्रवेश गर्न, ट्रान्जिटका रूपमा रहन, बस्न तथा त्यहाँबाट प्रस्थान गर्न पाउनेछन् ।
नेपाल सरकारकातर्फबाट ओमानका लागि नेपाली राजदूत शर्मिला पराजुली ढकाल र ओमानकोतर्फबाट त्यहाँको परराष्ट्र मन्त्रालयका सचिव (प्रशासन तथा लेखा) मोहम्मद विन नासिर विन मोहम्मद अल वहेबीले सम्झौतामा हस्ताक्षर गर्नुभएको जनाईएको छ ।
सम्झौतापछि ओमान र नेपालबीच हुने द्विपक्षीय औपचारिक भ्रमण, ट्रान्जिट भ्रमणलगायत अन्य गतिविधि बढाउन सहयोग पुग्ने मस्कटस्थित नेपाली दूतावासले जनाएको छ ।
त्यसैगरी पछिल्लो समय ओमान अन्तरराष्ट्रिय विमानस्थल व्यस्त ट्रान्जिटका रूपमा विकास भइरहेका सन्दर्भमा श्रमलगायत अन्य विविध गतिविधिका लागि त्यहाँ हुने भ्रमणमा समेत सो सम्झौताले सहजीकरण गर्ने जनाइएको छ ।
हस्ताक्षर कार्यक्रममा दुवै देशका प्रतिनिधिले प्रवेशाज्ञामा सहजीकरण भएसँगै दुवै देशले आपसी सम्बन्धका विविध आयामलाई थप गतिशील र सक्रिय बनाउनुपर्नेमा जोड दिएका छन् ।