पूर्णपुष्टि,फागुन ४
धनुषामा एक महिलाको शव फेला परेको छ । मंगलबार बिहान कमला नगरपालिका–२ मा करिब ३०/३५ वर्षीया संजितादेवी रावत मृत अवस्थामा फेला परेको इलाका प्रहरी कार्यालय खजुरीले जनाएको छ ।
साढे ७ बजे स्थानीयले रावतलाई उनको घरभन्दा तीन सय मिटर पश्चिममा रहेको बिशो यादवको खेतमा मृत अवस्थामा फेला पारेको प्रहरीले जनाएको छ ।
स्थानीयले महिलाको शव देखेपछि प्रहरीलाई जानकारी गराएको थियो । घटनाको जानकारी पाए लगतै प्रहरी टोली घटनास्थल पुगेका थियो ।
प्रहरीका अनुसार मृतक संजितादेवीको घाँटीमा निलडाम देखिएको छ । जसकारण उनको हत्या शंकास्पद भएको प्रहरीले जनाएको छ ।
उनको हिजो नै मृत्यु भएको पनि हुन सक्छ । अरू पोष्टमर्टम रिपोर्टपछि थाहा हुने प्रहरीले जनाएको छ ।
घटनापछि उनका श्रीमान् सुखी गडेरी रावत सम्पर्कविहीन छन् । उनी घटना सार्वजनिक भएदेखि नै बेपत्ता छन् । प्रहरीले उनको खोजी गरिरहेको छ । प्रहरीका अनुसार सुखी रावतका दुई श्रीमती छन् । मृतक संजितादेवी उनकी जेठी श्रीमती हुन् । प्रहरीले उनको कान्छी श्रीमती सुनिला रावतलाई नियन्त्रणमा लिइ अनुसन्धान गरिरहेको छ ।
प्रहरीले शव पोष्टमार्टम गर्न प्रदेश नम्बर २ को प्रादेशिक अस्पताल जनकपुर पठाएको छ ।
प्रहरीले यस घटनामा थप अनुसन्धान अघि बढाएको छ ।