पूर्णपुष्टि, जेष्ठ ३१
विश्वकै ठूलो परिवारको रुपमा प्रख्या रहेको भारतको मिजोरम प्रान्तको राजधानी आइजोल नजिकै रहेको बख्तवांग गाउँमा बस्ने घरमुली जियोना चानाको मृत्यु भएको छ । ७६ वर्षको उमेरमा जियोनाको मृत्यु भएको मिजोरमका मुख्यमन्त्री जोरामथंगाले ट्वीटमार्फत् सवैमा जानकारी गराएका छन् ।
मृतक जियोना चानाका परिवारमा ३८ पत्नी, ८९ जना छोराछोरी, १४ जना बुहारी तथा ३३ जना नातिनातिनीहरु गाउँमा रहेको १ सय कोठा भएको ४ तल्ले घरमासँगै बस्दै आएका आएका थिए ।
जियोना पेसाले सिकर्मी थिए । उनका पत्नी तथा बुहारीहरुले खेतीपाती गर्दै आएका छन् भने युवावस्थाका छोराहरुले विभिन्न प्रकारका काम गरेर परिवार चलाउनका लागि अर्थोपार्जन गर्दै आएका छन् । सबैभन्दा जेठी पत्नीले घरका सबै सदस्यको कार्यको बाँडफाँट गर्ने तथा उनीहरुको कामको निगरानी गर्ने गर्दछिन् ।
मूख्यमन्त्री जोरामथंगाका अनुसार बख्तवांग गाउँ सोही परिवारका कारण पर्यटकको आकर्षणको केन्द्र बनिसकेको छ ।
यो परिवारमा हरेक दिन ४५ किलो चामल, ३०/४० वटा कुखुरा, २५ किलो दाल, दर्जनौँ अण्डा तथा ६० किलो तरकारी खपत हुन्छ । साथै झण्डै २० किलो फलफूल पनि दिनहुँ सो परिवारमा खाने गर्दछन् ।