पूर्णपुष्टि, १५
उदयपुरमा २०७७ साल फागुन र चैत्र महिनामा कोरोना विरुद्धको पहिलो डोज कोभिसिल्ड खोप लगाएकालाई आजबाट दोस्रो मात्राको खोप लगाउन सुरु गरीएको छ । पहिलो डोज कोभिसिल्ड खोप लगाएर दोस्रो मात्राको पर्खाइमा रहेका लक्षित वर्गलाई यो खोप लगाउन सुरु गरिएको जिल्ला स्वास्थ्य कार्यालय उदयपुरले जनाएको छ ।
स्वास्थ्य कार्यालयका अनुसार साविकै खोपकेन्द्रहरुबाट दोस्रो मात्राको खोप लगाउन सुरु गरिएको छ । त्रियुगा नगरपालिका अन्तर्गतको खोपकेन्द्रहरुमा भदौ १५ देखी १८ गते सम्म खोप लगाईने छ । त्यस्तै, चौदण्डीगढी र बेलका नगरपालिका अन्तर्गतका खोपकेन्द्रहरुमा भदौ १५ देखी १९ गते सम्म खोप लगाउने कार्याक्रम रहेको छ ।
लिम्चुङबुङ र रौतामाई गाउँपालिका अन्तर्गतकाका खोपकेन्द्रहरुमा भदौ १७ देखी २० गते सम्म खोप लगाइने छ । उदयपुर जिल्ला अस्पतालमा भदौ १७ र २० गते मात्र खोप सञ्चालन गरिने स्वास्थ्य कार्यालयले जनाएको छ ।
त्यसैगरी, ताप्ली र उदयपुरगढी गाउँपालिका अन्र्तगतका खोपकेन्द्रहरुमा भदौ २६ देखी ३० गते खोप लगाईने छ । कटारी नगपालिका अन्र्तगतका खोपकेन्द्रहरुमा पनि भदौ २६ देखी ३० गते सम्म खोप लगाउने कार्यक्रम सञ्चालन गरिने छ । पहिलो मात्राको कोभिसिल्ड खोप लगाएका वर्गले साविक अनुसारकै खोपकेन्द्रमा आफ्नो खोपकार्ड र परिचय पत्रसहित दोस्रो मात्राको खोपको लागि उपस्थित हुन स्वास्थ्य कार्यालयले अनुरोध गरेको छ । खोपकेन्द्र सञ्चालन हुने स्थान बारे अन्योल भएमा ९८५२८३५३७७ मा अवधनारायन चौधरीलाई सम्पर्क गरी बुझ्न समेत अनुरोध गरिएको छ ।