ट्राफिक सप्ताहको क्रममा उदयपुरमा गरिएको स्वास्थ्य परिक्षणमा अधिकांश चालकमा देखियो उच्च रक्तचाप

पूर्णपुष्टि, पुष १२
ट्राफिक सप्ताहको क्रममा उदयपुरमा गरिएको स्वास्थ्य परिक्षणमा अधिकांश चालकहरुको उच्च रक्तचाप (ब्लड प्रेसर हाइ) देखिएको छ । सप्ताह कार्यक्रम अन्तर्गत आइतबार ५० जना चालकहरुको स्वस्थ्य परिक्षण गरिएको मध्ये २६ जनामा उच्च रक्तचाप देखिएको थियो । यो परिक्षण संख्याको ५१ प्रतिशत रहेको छ । जिल्लाको सदरमुकाम गाईघाटदेखि सञ्चालन हुने साना तथा ठूला सवारी साधनका चालक र सहचालकसमेतको स्वस्थ्य परिक्षणको क्रममा अधिकांश चालकहरुमा उच्च रक्तचाप देखिएको हो ।
विभिन्न ठाउँको गन्तब्यमा हिडेका चालकहरुमा तनावका कारण उच्च रक्तचापको समस्या देखिएको जिल्ला ट्राफिक इन्चार्ज लिलाकुमार श्रेष्ठले बताउनुभयो । परिक्षणमा उच्च रक्तचाप देखिएका चालक तथा सहचालकहरुलाई तनावमा नहिड्न, समयमा खान, आराम गर्न सुझाव दिइएको थियो । रक्तचाँप ठीक बनाउने खानपिनमा ध्यान दिनुका साथै आवश्यकता अनुसार औषधिसेवन गर्नसमेत सुझाइएको छ ।
उदयपुर अस्पतालका मेडिकल अधिकृत डा. जीवनारायण मण्डलका अनुसार रक्तचाँप बेलाबेलामा परिक्षण गर्नुपर्दछ । उच्च रक्तचापले सुगर, पक्षघात जस्ता रोगहरु निम्त्याउन सक्छ । जसले आँखा कमजोर हुने, प्यारालाइसिस हुने जस्ता समस्या आउनसक्छ । यसले चालकमा दुर्घटनाको उच्च जोखिम हुन्छ । डा. मण्डलका अनुसार दैनिक सात÷आठ घण्टासम्म आरामको जरुरी हुन्छ । बेलैमा परिक्षण गरेर खानपान, आराम तथा औषधि उपचारबाट उच्च रक्तचाप ठीक पार्न सकिने भएकोले बेलबेलामा परिक्षण गर्न/गराउन उहाँको सुझाव छ ।

यातायात व्यवस्था सेवा कार्यालय गाईघाट, इलाका प्रहरी कार्यालय जलजलेसमेतको संयुक्त आयोजनामा चालकहरुको स्वस्थ्य परिक्षणसंगै सवारी साधनहरुको अवस्था तथा प्रदुर्षण चेकजाँचसमेत गरिएको थियो । चेकजाँचको क्रममा कागजपत्र, नम्बर प्लेट, प्रदुर्षण जाँच जस्ता कुराहरु पनि फेल भएको पाइएपछि नियमको पालना तत्काल गर्न निर्देशन गरिएको थियो ।
पुष ४ गतेदेखि सुरु सप्ताह कार्यक्रम अन्तर्गत फुटपाथ पसल तथा सामान ब्यवस्थापन, ट्राफिक चिन्ह प्रचार, सवारी साधनका आरक्षण सिट, यात्रु क्षमता परिणाम, सिट क्षमता आदिको चेकजाँच गरिएको थियो । त्यसैगरी विद्यार्थीलाई सचेतना कक्षा सञ्चालन, विद्यार्थीसहित फिल्ड ट्राफिक सचेतना लगायतको कार्यक्रमसमेत गरिएको ट्राफिक प्रहरी भुवन राईले बताउनुभयो ।

ट्राफिक सप्ताह कार्यक्रमले सर्बसाधारण नागरिकलाई दुर्घटनाबारे सचेतना फैलाएको छ । सहायक प्रमुख जिल्ला अधिकारी विनोदकुमार पोखरेलले आज आयोजित सप्ताह कार्यक्रमको समापनमा सातदिनको कार्यक्रम भएपनि नागरिकमा जीवनभरलाई चेतना जगाउने काम भएको बताउनुभयो । जिल्ला प्रहरी प्रमुख एसपी सुवासचन्द्र बोहोराले यातायात सेवाको क्षेत्रमा सबैभन्दा पहिले सवारी चालक आफै सचेत हुनुपर्ने बताउनुभयो । चालक सचेत भए दुर्घटनाको अवस्था न्यून हुने उहाँले बताउनुभयो । त्रियुगा नगरपालिका वडा नं. १३ की वडाध्यक्ष पशुपती चौधरीले चालकले पहिलो सर्त मादक पदार्थ सेवन गर्न नहुने बताउनुभयो । “चालक एकजनाको हातमा सयौं यात्रुको जीवन अडेको हुन्छ” वडाध्यक्ष चौधरीले भन्नुभयो “त्यसैले उत्तिकै जिम्मेवार भएर सवारी चलाउनुपर्छ ।” हरेकवर्ष ट्राफिक सप्ताह मनाउने गरिएको भएपनि यसवर्ष नागरिकको सहभागिता उल्लेख्य रहेको थियो ।

यो खबर पढेर तपाईलाई कस्तो महसुस भयो ?
+1
0
+1
0
+1
0
+1
0
+1
0
+1
0
+1
0
%d bloggers like this: