सुनिल राई, गाईघाट । उदयपुरको त्रियुगा नगरपालिका वडा नं. ४ बगाहामा छैठौँ वडा अध्यक्ष कप फुटबल प्रतियोगिता आजदेखी सुरु भएको छ । शनिबार बगाहाको खेल मैदानमा भएको उद्घाटन खेलमा राईटोल फुटबल क्लब (राईटोल) ले टाईब्रेकरमा सनराईज फुटबल क्लब (शिवशक्ति टोल) लाई ४–३ गोलले पराजित गर्दै विजयी सुरुवात गरेको हो ।
खेलको ४१ औ मिनेटमा जर्सी नं. ६ का मनोज बस्नेतले गोल गर्दै सनराईजलाई आग्रता दिलाएका थिए भने खेलको अन्तिम औँ मिनेटमा जर्सी नं. ११ का अबिनव राईले राईटोलका लागी बराबरी गोल गरे ।
निर्धारित समयमा १–१ गोलको बराबरी भएसँगै ट्राईबेकरमा पुगेको खेलमा राईटोलका ४ खेलाडीले गोल गरे भने सनराईजका ३ खेलाडीले गोल गरे । यस खेलको म्यान अफ द म्याच राईटोलका गोल रक्षक निलम राई बने । उनलाई प्रमुख अतिथि वडा नं. ४ का वडा अध्यक्ष बद्रि बस्नेतले मेडल, फ्लेक्स र नगद हस्ताण्तरण गरेका थिए ।
यस प्रतियोगिताको विजेताले ट्रफी, मेडर र नगद रु. २५ हजार प्राप्त गर्नेछ भने उपविजेताले ट्रफी, मेडर र नगद रु. १५ हजार प्राप्त गर्नेछ । भोली आयोजक बगाहा युवा समुह र शिव पार्वति फुटबल क्लबबिच खेल हुनेछ । आजको बिजेता राईटोलले आदर्श फुटबल क्लबसँग सेमिफाईनल खेल्नेछ । ७ टिमको सहभागिता रहेको यस प्रतियोगितामा विद्यागत पुरस्कार समेत प्रदान गरिने आयोजकले जनाएको छ । आजदेखी सुरु भएको प्रतियोगिताको फाईनल खेल १५ गते हुनेछ ।
