मेडिकल कलेजले बढी शुल्क लिएको भन्दै सात विद्यार्थी संगठनको आपत्ति, शुल्क अध्ययन गर्न अनुगमन टोली गठन

पूर्णपुष्टि, पुष २२
चिकित्सा शिक्षा अध्यापन गराउने तीन कलेजले मापदण्डविपरीत बढी शुल्क लिएको गुनासो आएपछि विभिन्न सात विद्यार्थी संगठनहरुले आपत्ति जनाएका छन् ।
काठमाडौं मेडिकल कलेज सिनामंगल, नोवेल मेडिकल कलेज मोरङ र मणिपाल मेडिकल कलेज कास्कीले बढी शुल्क लिएको घटनाप्रति आपत्ति जनाउँदै उनीहरूले संयुक्तरूपमा विज्ञप्ति निकाल्दै आपत्ति जनाएका हुन् ।
नेपाल विद्यार्थी संघ, अनेरास्ववियूलगायत सात विद्यार्थी संगठनले संयुक्त विज्ञप्ति जारी गरेको हो ।
त्यसैगरी, एमबीबीएस अध्ययन गर्ने विद्यार्थीले विराटनगरको नोबेल मेडिकल कलेजमा तालाबन्दी गरेका छन् । कलेजले सरकारले तोकेको भन्दा बढी शुल्क माग गर्दै विद्यार्थीलाई कक्षा प्रवेशमा रोक लगाएको भन्दै आन्दोलनरत विद्यार्थीले तालाबन्दी गरेका हुन् ।
यसअघि कलेजले होस्टललगायत शीर्षकमा अतिरिक्त शुल्क नतिर्ने विद्यार्थीलाई कक्षा प्रवेशमा रोक लगाएको थियो ।
चिकित्सा शिक्षा आयोगले मेडिकल कलेजहरुले लिएको अतिरिक्त शुल्कको विषयमा अध्ययन गर्न एक समिति गठन गरेको छ । धेरै मेडिकल कलेजहरुले आयोगले तोकेको भन्दा बढी शुल्क लिएको भन्दै विद्यार्थीहरुले आन्दोलन गरिरहेका बेला आयोगले मेडिकल कलेजहरुको अनुगमनका लागि टोली गठन गरेको हो ।


बुधबार शिक्षा. विज्ञान तथा प्रविधि मन्त्रालयका प्रवक्ता दीपक शर्माले विज्ञप्ति जारी गरी मेडिकल कलेजहरुले बढी शुल्क लिएको पाइए चिकित्सा शिक्षा ऐन अनुसार सम्बन्धन खारेजसम्मको कारबाही गर्न सकिने बताएका छन् ।
मेडिकल कलेजहरुले तोकेको भन्दा बढी शुल्क लिएको वा नलिएको विषयमा अध्ययन गर्न आयोगले अनुगमन टोली नै गठन गरेको उनले विज्ञप्तिमा उल्लेख गरेका छन् ।

मेडिकल कलेजहरुलाई विगमा शिक्षा र गृह मन्त्रालयले निर्धारित भन्दा बढी शुल्क नलिन निर्देशन दिएको भन्दै विज्ञप्तिमा बढीशुल्क लिएको पाइए चिकित्सा शिक्षा ऐन २०७५ को दफा १४ अनुसार सम्बन्धन खारेजको कारबाही गर्न सक्ने चेतावनी दिइएको छ ।
विज्ञप्तिमा भनिएको छ, ‘दिएको निर्देशनलाई बेवास्ता गरी गैरकानूनी रुपमा विद्यार्थीबाट बढी शुल्क असुल गरिएमा राष्ट्रिय चिकित्सा शिक्षा ऐन, २०७५ को दफा १४ बमोजिम कारबाही हुने व्यहोरा सूचित गरिन्छ ।’

यो खबर पढेर तपाईलाई कस्तो महसुस भयो ?
+1
0
+1
0
+1
0
+1
0
+1
0
+1
0
+1
0
%d bloggers like this: