जनगणनामा मनपरी प्रश्न सोधेको भन्दै आदिवासी जनजातिको ध्यानाकर्षण

पूर्णपुष्टि, कार्तिक ३०
राष्ट्रिय जनगणना २०७८ सुरु भएको आज छैठौ दिनमा आईपुग्दा गणना गर्ने क्रममा गणकहरुले मनपरी प्रश्न सोधेको भन्दै आदिवासी जनजाति संगठनहरुले ध्यानार्कषण गराएका छन् । आज बिहान साढे १० बजे तथ्याङ्क विभागको कार्यालयमा आदिवासीजन्य संगठनहरूले ध्यानाकर्षण गराउँदै आपत्ति जनाएका हुन् ।
जात÷जाति, पूर्खाको भाषा, मातृभाषा, दोश्रो भाषा र धर्मसँग सम्बन्धित महत्त्वपूर्ण प्रश्नहरूको उत्तरहरू गणकहरू आफैले भरिदिएको जानकारी आएकोले आपत्ति जनाउँदै आदिवासी जनजाति संगठनले महानिर्देशकलाई त्यसो नगर्न निर्देशन दिन आग्रह गरेका छन् ।
विभागको महानिर्देशक नेबिनलाल श्रेष्ठ र उपमहानिर्देशक हेमराज रेग्मीलाई आदिवासी जनजाति महासंघ तथा लिम्बू, तामाङ, नेवार, मगर, गुरूङ, शेर्पा, थामीलगायतका अध्यक्ष तथा पदाधिकारीहरूले गणना भइरहेको त्रुटि र असंवेदनशीलताबारे छैठौ दिनमा ध्यानाकर्षण गराएका हुन् ।
उनीहरुले गणना भइरहेको समयमा विभिन्न तवरले खबरदारी र सहयोग गरिरहँदा पनि तथ्यांक विभाग र यसका संयन्त्रहरूले प्रश्नावलीमा हेलचेक्र्याइँ गरेकाले सच्याउन आग्रह गरेका छन् ।
यता, महानिर्देशक नेबिनलाल श्रेष्ठले भने गणकले मनपरी र व्यक्तिगत प्रश्न सोध्न नमिल्ने भन्दै उनीहरूले त्यसो गरे कार्बाही हुने बताए । तालिमका क्रममा गणकहरूलाई के–के सोध्न मिल्ने र के–के नमिल्ने भनेर तालिम दिइएको उनले प्रष्ट पारे ।