पूर्णपुष्टि, भदौ १२
थुनुवामा रहेका व्यक्तिलाई छुटाईदिने भन्दै ५० हजार लिएको आरोपमा एक युवक पक्राउ परेका छन् । पक्राउ पर्नेमा तुलसीपुर उपमहानगरपालिका– ८ निवासी २० वर्षीय प्रतिक बस्नेत रहेका छन् । बस्नेत आफै ८ हजार धरौटीमा छुटेको व्यक्ति रहेको प्रहरीले जनाएको छ ।जिल्ला प्रहरी कार्यालय दाङको थुनुवा कक्षमा रहदा बस्नेतले अन्य तीन जनासँग चिनजान गरेर परिवारका सदस्यको नम्बर लिई उनीहरुलाई छुटाउने भन्दै ५० हजार रुपैयाँ लिएका थिए । तर थुनुवाहरु नछुटेपछि परिवारले प्रहरीलाई जानकारी दिएका थिए । अनुसन्धानको क्रममा बस्नेतले नै रकम लिएको खुलेको जिल्ला प्रहरी कार्यालयका प्रवक्ता राजनकुमार गौतमले बताए । बस्नेतलाई प्युठानबाट शनिबार पक्राउ गरिएको प्रहरीले जनाएको छ । पक्राउ परेका बस्नेतको सम्बन्धमा थप अनुसन्धान भइरहेको गौतमले बताए ।