पूर्णपुष्टि, चैत १३
उदयपुरका प्रमुख जिल्ला अधिकारी दिपक कुमार पहाडीले लक डाउनको तेस्रो दिन देखि वास्ताविक लकडाउनको अवस्था देखिन थालेको बताउनु भएको छ । पहिलो दिन भन्दा दोस्रो दिन र दोस्रो दिन भन्दा आज तेस्रो दिन मानवीय गतिविधि तथा सवारी सञ्चालन ठप्प बनेको उहाँले बताउनुभयो ।
विस्तारै नागरिकहरुमा लकडाउनको अर्थ बुझाई र कोरोना भाईरसको संक्रमण प्रति सचेतना बढ्दै गईरहेकोले लकडाउन पालना देखिएको उहाँको भनाई छ । प्रशासनको तर्फबाट लकडाउन पालनाकोे निम्ति नागरिकहरुलाई कडाई गरिराखिएको छ । लकडाउन अवज्ञा नगर्न आह्वान गर्दै अनावश्यक हिडडुल सवारी सञ्चालनमा पूर्ण प्रतिवन्ध लगाईएको छ । जिल्ला प्रवेशका नाकाहरुमा विषेश सुरक्षा जाँच सहित प्रवेश निषेधमा कडाई गरिएकोे छ ।
अटेर गरी बाहिर देखिएका सवारी साधन र मानिसलाई प्रहरीले कार्वाही गरिरहेको छ । जिल्ला प्रहरी प्रमुख एसपी वीर बहादुर बुढामगरले लकडाउन पालनामा नागरिक सचेतना बढेको बताउनुभयो । तथापी केही सवारी साधन कार्र्वाहीको लागि नियन्त्रणमा लिनु परेको उहाँले बताउनुभयो ।
एसपी मगरका अनुसार आज तेस्रो दिन १० ओटा मोटरसाईकल १३ ओटा साईकल र १ ओटा ट्याक्टर नियन्त्रणमा परे । मोटर साईकालका चाबी मात्र भने ३० ओटा नियन्त्रणमा परेको जनाइएको छ । सवारी साधन नियन्त्रणको यो संख्या निकै कम हो । पहिलो दिन ४ सय ६२, दोस्रो दिन १ सय ५१ ओटा नियन्त्रणमा परेका थिए ।
सुरक्षाकर्मीको तैनाथी र कडाईका कारण लकडाउन अवज्ञा गर्ने क्रम घट्दै गएको एसपी मगरले बताउनुभयो । ग्याँस तथा खाद्यन्नको कारण साँझ पख भिँड हुने क्रममा पनि आज कमि आएको थियो ।
पहिलो र दोस्रो दिन भन्दा आज बजारमा सवारी साधन र सर्वसाधरणले लक डाउनको अवज्ञा गर्ने कम भएको महसुस बजारवासीले समेत गरेका छन् । त्रियुगा उद्योग बाणिज्य संघका पूर्व प्रथम उपाध्यक्ष भरत चाम्लिङले नागरिकहरुको बुझाइमा बृद्धि भएकाले बाहिर निस्किने क्रम घटेको बताउनुभयो । लकडाउनको क्रममा रमित हेर्ने, लापर्वाही गर्नेहरुका कारण प्रहरीले थप कडाई गरिदिदा वास्तविक समस्यामा परेकाहरुलाई विषेश र अत्यावश्यक काममा निस्कन अबरोध पुग्ने गरेको उहाँले बताउनुभयो । त्यसैले अनावश्यक रुपमा कसैले पनि बाहिर निस्कन नहुने उहाँको आग्रह छ ।
सधै झैँ तेस्रो दिन पनि प्रहरीले चोक तथा नाकाहरुमा कडाईका साथ चेक बसेको थियो । नेपाल भरी भईरहेको लक डाउन सफल बनाउन सरकार तथा सरकारी निकाय, बुद्धिजिवी, समाजसेवी, नागरिक समाज, लगायत सर्वसाधरणहरुले यसलाई पूर्ण पालना गर्नु अवस्था छ ।
लक डाउनको अवज्ञा गर्ने धरैलाई प्रहरीले कानुन बमोजिमको कार्वाही गर्ने जनाएको छ । भन्दा भन्दै अटेर गर्नेहरुलाई ठाउँ ठाउँमा भाटे कार्वाही समेत प्रहरीले थालेको छ ।
।
बिषेश कमाण्ड पोष्ट गठन
जिल्लामा कोरोना भाइरस संक्रमण रोक्न तथा सबै हिसावले उच्च सतर्कता अपनाउन प्रमुख जिल्ला अधिकारीको नेतृत्वमा विषेश कमाण्ड पोष्ट आज गठन भएको छ ।
प्रजिअ दिपक कुमार पहाडीको नेतृत्वमा सुरक्षा प्रमुखहरु त्था सरकारवाला निकायहरुको सम्लग्नता रहने विषेश कमाण्ड पोष्ट गठन भएको हो । यसले जिल्लामा हुने कोरोना भाइरसको संक्रमण रोकथामका गतिविधि तथा उपायहरु अवलम्वन गर्ने जनाईएको छ । साथै संक्रमित तथा संकास्पद मानिस भेटिएमा उपचार तथा चेकजाँजका निम्ति सम्बन्धित ठाउँमा पठाउने व्यवस्था गर्ने बताइएको छ ।
प्रजिअ पहाडीका अनुसार हालसम्म जिल्लामा बिरामी फेला परेको छैन । संकास्पद ३ जनाको परिक्षणका लागि धरान पठाइएको छ । अर्का एक जना कटारी अस्पतालमा उपचारमा राखिएको छ भने कटारीको त्रिवेणी वेलस्रोत स्थित करेन्टाइनमा २६ जना राखिएका छन् ।
कमाण्ड पोष्टले जिल्लाका ८ ओटै पालिकाहरुलाइ करेन्टाईन स्थापना गर्न भनेको छ । बेलका नगरपालिकाले भने निर्माण गरिसकेको छ । अन्य पालिकाहरु निर्माणमा जुटेको जनाईएको छ ।