पूर्णपुष्टि, कार्तिक १४ । अविरल वर्षासँगै देशका प्रमुख राजमार्गहरूमा पहिरो र बाढीको समस्या बढेको छ । बीपी राजमार्ग र मेची राजमार्गका महत्त्वपूर्ण सडकखण्डहरू अवरुद्ध हुँदा हजारौं यात्रुहरू अलपत्र परेका छन् ।
काभ्रेपलाञ्चोक खण्डमा पर्ने बीपी राजमार्गको विभिन्न स्थानमा ठूला पहिरो र लेदो खसेपछि यातायात सेवा पूर्ण रूपमा ठप्प भएको छ । नमोबुद्ध नगरपालिका–६ चौकीडाँडा, रोशी गाउँपालिका–७ बेशी, रोशी–११ डालाबेशी, रोशी–९ बिरुवाडाँडा, बोक्सीकुना र नार्के क्षेत्रमा माथिबाट ठूलो परिमाणमा लेदो र ढुंगा खसेको छ । यी स्थानहरूमा सडक दुबै दिशाबाट पूर्णतया अवरुद्ध भएको जनाइएको छ । पूर्वतर्फ जाने सवारी साधनहरू काभ्रेपलाञ्चोकको भकुन्डे क्षेत्रमा रोकिएका छन् । राजमार्ग खुलाउन केही समय लाग्ने भएकाले यात्रुहरूले समस्या भोग्नुपरेको छ ।
जिल्ला प्रहरी कार्यालय र ट्राफिक प्रहरी कार्यालय काभ्रेको टोली घटनास्थलमा पुगेर सडक सञ्चालनमा ल्याउने प्रयास गरिरहेको छ । तर निरन्तर परिरहेको वर्षा र भीरालो भूभागका कारण काममा निकै कठिनाइ भोगिरहेको प्रहरीले बताएको छ । पहिरो हट्ने क्रममा पुनः नयाँ लेदो खस्ने जोखिम उच्च रहेको पनि जनाइएको छ ।
इलाम जिल्लामा लगातारको वर्षाले मेची राजमार्गअन्तर्गत दुई प्रमुख सडक खण्ड पूर्ण रूपमा बन्द भएका छन् । मेची राजमार्गको राजदुवाली सडक खण्डमा सडक भासिन, चिरिन र दबिन थालेपछि यातायात सेवा पूर्णतया रोकिएको इलाम जिल्ला प्रशासनले जनाएको छ । यो खण्ड इलामको मुख्य सवारी आवागमन मार्ग हो ।
त्यस्तै, तिल्केनी–सिमलगोलाइ–शिल्पुर सडक खण्डमा पनि ठूलो पहिरो जाँदा सवारी आवतजावत बन्द भएको छ । जिल्ला प्रशासन कार्यालय इलामले सूचना जारी गर्दै अर्को सूचना प्रकाशित नभएसम्म यी दुवै सडक खण्डमा सवारी सञ्चालनमा पूर्ण प्रतिबन्ध लगाइएको जानकारी गराएको छ । यात्रुहरूलाई वैकल्पिक मार्ग खोज्न सुझाव दिइएको छ ।
मुग्लिन–नारायणगढ सडक खण्डअन्तर्गत तुइन खोला पुल नजिकैको क्षेत्रमा साना ढुंगा र पहिरो खस्ने क्रम भने अझै जारी रहेको छ । सडक डिभिजन कार्यालय भरतपुरले मेसिनको प्रयोग गरेर साना पहिरो पन्छाउँदै सडक सञ्चालनमा राखेको जानकारी दिएको छ । तर वर्षातको समयमा यस क्षेत्रमा पहिरोको उच्च जोखिम भएकाले सवारी चालकहरूलाई सतर्कता अपनाउन आग्रह गरिएको छ ।
सडक डिभिजनले सडकको अवस्था बुझेर मात्र यात्रा सुरु गर्न, लेन अनुशासनमा रहन र सुरक्षित गतिमा सवारी चलाउन चालकहरूलाई आग्रह गरेको छ । वर्षाको समयमा यस क्षेत्रमा जुनसुकै बेला ठूलो पहिरो जान सक्ने भएकाले अत्यन्त सावधानी अपनाउन सुझाव दिइएको छ ।