पूर्णपुष्टि, माघ १५
बरिष्ट संगितकार एवम् लोक बाजा संरक्षण अभियन्ता बुलु मुकारुङले लोक बाजाहरु लोप हँुदै जादा नेपाली पहिचानहरु गुम्दै जाने चिन्ता व्यक्त गर्नुभएको छ ।
हाल उहाँ लोक बाजा संरक्षण अभियानमा जुट्नु भएको छ । यसक्रममा उदयपुरको गाईघाटमा पत्रकारहरुसंगको भेटघाटमा यस्तो चिन्ता व्यक्त गर्नु भएको हो । नेपालका बिविध जातजाति, धर्म, संस्कृति, संस्कार, चाँडपर्व नै नेपालको पहिचान र सम्पत्ति हो भन्दै त्यस संग जोडिएका लोक बाजाहरुको बिषेश महत्व रहेको बताउनुभयो । 
क्षेत्रि, ब्राह्मण, दलित समुदाय, आदिवासी जनजाति समुदाय भित्रका राई, मगर, लिम्वु, तामाङ, दनुवार, चौधरी आदिले प्रयोग गर्ने लोक बाजाहरु उनिहरुको पहिचान संग जोडिएको हुदा महत्वपूर्ण रहेको उहाँको भनाई छ । तर दिनानु दिन यी लोक बाजाहरु लोप हुने क्रम बढ्दो रहेकोले नेपाली पहिचान गुम्ने र नेपाली सम्पदा गुम्ने खतरा बढेको बताउनुभयो ।
त्यसप्रति स्वयम् समुदाय, जाति संरक्षणमा जुट्नु पर्नेमा जोड दिदै सरकारको वा अरुको मुख ताकेर नहुने बताउनुभयो । सबै जातिको लोक बाजा र उनिहरुको भाषा, धर्म, संस्कार, संस्कृति जगेर्णा, संरक्षण र सम्बद्र्धनमा राज्यको ध्यानाकर्षण गराउन गराउन पनि उत्तिकै लाग्नु पर्ने बताउनुभयो । 
राज्यले यस्तो दायित्व निर्वाह नगरेकोमा दुख व्यक्त गर्दैै अबका दिनमा राज्यको मुख मात्र ताक्ने नभई आफै अग्रसर भई संरक्षण तर्फ नलागेमा पुरै लोप हुने प्रति सचेत गराउनुभयो । अहिले सम्म काही कतै लोक बाजाहरु भेटिने, बनाउन सकिने वा त्यस बारेमा जानकारी प्राप्त गर्न सकिने अवस्था रहेकाले यतिवेला यस तर्फ लाग्न सबैलाई आग्रह गर्नुभयो । लोपोन्मुख लोक बाजाहरुको संकलन गरी संग्राहलय निर्माणमा जुट्नु पर्नेमा जोड दिनुभयो । 
उहाँले लोक बाजाहरुबारे सोधखोज गरी पुस्तक नै प्रकाशन गर्ने लक्ष्यका साथ अभियानमा जुट्नुभएको जानकारी दिनुभयो । लोक बाजा लोप हुदै जानुमा लोक बाजा संग मानिसको आयआर्जन नजोडीनु, आधुनिक बाजागाजाको प्रयोग बढ्नु, मौलिक संस्कृति भन्दा पाश्चात्य संस्कृतिमा रमाउनु जस्ता कारणहरु रहेको उहाँले बताउनुभयो ।
लोप बाजालाई बिर्सदै जादा नेपाली सम्पदा र मौलीक पहिचान गुम्ने कुरा प्रति भने नेपाली समाज सचेत हुन नसकिएकोले यस तर्फ सबै सचेत हुनु पर्नेमा जोड दिनुभयो ।