पूर्णपुष्टि, असार १८
राष्ट्रिय ध्वजावाहक नेपाल वायुसेवा निगम (नेपाल एअरलाइन्स) ले यूएनको शान्ति मिसनमा खटिने नेपाली सेनालाई लैजान अफ्रिकन देशमा चार्टर्ड उडान गर्ने भएको छ ।
नेपाली सैनिकलाई संयुक्त राष्ट्र सङ्घ (यूएन) को शान्ति मिसनमा लैजान नेपाल एअरलाइन्सको चार्टर्ड उडान सेन्ट्रल अफ्रिकन रिपब्लिक र मालीमा गर्ने भएको निगमको अपरेशन विभागले जनाएको छ ।
निगमको बजार विविधीकरणको योजना अनुरुप संयुक्त राष्ट्र सङ्घको सेन्ट्रल अफ्रिकन रिपब्लिकन र मलिकोमिनुसामा नेपाली सेनालाई लैजाने सम्बन्धमा आज निगम र नेपाली सेनाका उच्च अधिकारीबीच सम्झौता भएको हो ।
सम्झौतानुसार मिसनका लागि खटिने नेपाली सेनालाई आगामी आसार २४ गते अर्थात् जुलाई ८ तारिखमा वाइडबडी जहाजमार्फत अफ्रिकन रिपब्लिक र माली लगिने भएको छ ।
निगमको वाइडबडी जहाज काठमाण्डौबाट कतारको दोहामा प्राविधिक उडान गर्दै त्यहाँबाट सेन्ट्रल अफ्रिकन रिपब्लक पुग्ने जनाइएको छ । त्यही जहाजबाट शान्ति मिसनमा रहेका ती देशबाट सैनिक स्वदेश फर्काइनेछ । नयाँ गन्तव्यको चार्टर्ड उडानलाई कम्पनीले चुनौती र अवसर दुवै रुपमा लिएको जनाईएको छ ।