पूर्णपुष्टि, असोज ७ । गोर्खा मिडिया नेटवर्क प्रालिका पूर्व सञ्चालक एवं नेपाल प्रहरीका पूर्वनायब महानिरीक्षक (डीआईजी) छविलाल जोशी सहकारीको रकम ठगी आरोपमा पक्राउ परेका छन्। काठमाडौं उपत्यका अपराध अनुसन्धान कार्यालयको टोलीले जोशीलाई आइतबार अपराह्न शंखमूलबाट नियन्त्रणमा लिएर कास्की लगेको छ।
जोशीलाई पोखराको सूर्यदर्शन सहकारीको बचत अपचलन प्रकरणको अनुसन्धानका लागि पक्राउ गरिएको कास्की प्रहरी प्रमुख एसपी मोहन थापाले जानकारी दिए। उनलाई सोमबार जिल्ला अदालतमा उपस्थित गराएर अनुसन्धानका लागि म्याद लिने तयारी छ।
गोर्खा मिडियाका अध्यक्ष गितेन्द्रबाबु (जीबी) राई, प्रबन्ध निर्देशक रवि लामिछाने र सञ्चालक जोशीको हस्ताक्षर चल्ने खातामा विभिन्न सहकारीबाट ६५ करोड ५४ लाख रुपैयाँ ल्याएर खर्च गरिएको थियो। संसदीय विशेष समितिले यी चारै जनामाथि ठगी, किर्ते, संगठित अपराध र सम्पत्ति शुद्धीकरणका दफा आकर्षित हुने निष्कर्ष निकालेको थियो।
जोशीको पक्राउसँगै सहकारी ठगी प्रकरणको अनुसन्धानले गति लिने देखिएको छ। यसअघि तत्कालीन गृहमन्त्री लामिछानेले अनुसन्धानमा अवरोध गरेको आरोप छ। सूर्यदर्शन सहकारीमा करिब १८ हजार ७ सय सर्वसाधारणको बचत हिनामिना भएको छ। अनुसन्धानको दायरा अब अन्य सहकारीतर्फ पनि विस्तार हुने सम्भावना रहेको छ।