पूर्णपुष्टि, असार ६
अत्यावश्यक कामबाहेक बाहिर ननिस्कन आमनागरिकलाई सरकारले पुनः आग्रह गरेको छ । कोभिड–१९ संकट व्यवस्थापन केन्द्र ९सिसिएमसी० को हिजो बसेको बैठकले अत्यावश्यक काममा बाहिर निस्कदा अनिवार्य मास्क प्रयोग गर्न र भीडभाड नगर्न तथा भौतिक दूरी कायम गर्न आग्रह गरेको हो ।
महामारी नियन्त्रणमा प्रदेश र स्थानीय सरकारले गरेका कामको उच्च मूल्याङ्कन गर्दै आगामी दिनमा थप समन्वय गर्दै अघि बढ्ने निर्णय गरेको केन्द्रका सदस्य एवं परराष्ट्रमन्त्री प्रदीप ज्ञवालीले जानकारी दिनुभयो । देशैभरका क्यारेन्टिन स्थललाई थप व्यवस्थित गर्दै लैजाने र त्यसको अनुगमन र सहजीकरणको काम प्रदेश सरकारले गर्ने, क्वारेन्टिनमा रहेकाको तत्काल स्वास्थ्य परीक्षण गर्न स्वास्थ्य तथा जनसङ्ख्या मन्त्रालयको राष्ट्रिय परीक्षण निर्देशिका अनुसार त्यहाँ बसेको दुई हप्ताभित्र सक्ने निर्णय गरेको छ ।
सङ्क्रमण बढ्दै गएपछि थप आइसोलेसन केन्द्रको आवश्यकता पर्ने र त्यसको व्यवस्थान गर्न प्रदेश सरकारलाई आग्रह गरिएको उहाँले बताउनुभयो । कोरोनाको पिसिआर परीक्षण प्रयोगशालाको क्षमता बढ्दै गएको र शुक्रबार मात्रै ६ हजार ३ सयको स्वास्थ्य परीक्षण गरिएको मन्त्री ज्ञवालीले बताउनुभयो ।
यसैगरी बैठकले विदेशमा नेपाली कूटनीतिक नियोगबाट काम गरेर स्वदेश फर्कनुपर्ने र नयाँ जिम्मेवारी सम्हाल्न जानुपर्ने कर्मचारी र उनका परिवारका सदस्यलाई जान छुट दिने निर्णय गरेको छ । साथै वैदेशिक रोजगारमा रहेर बिदामा नेपाल आएका र नयाँ रोजागारीका लागि विदेश जाने श्रमिकको हकका श्रम मन्त्रालय र विद्यार्थीको हकमा शिक्षा मन्त्रालयलाई सिफारिस गरेर उनीहरुलाई पठाउने निर्णय पनि गरिएको छ ।
बैठकले सङ्क्रमण बढ्दै गएको र नयाँ आइसोलेसन र क्वारिन्टन बनाउनुपर्ने आवश्यकतालाई ध्यानमा राखेर केन्द्रीय कोभिड–१९ कोषबाट रु ३५ करोड प्रदेश सरकारमार्फत सम्बन्धित पालिकालाई दिने निकासा दिने निर्णय गरेको छ । सङ्क्रमण एकदमै बढ्दै गएपछि जोखिम मूल्याङ्कन गरेर आवश्यक पर्दा सिङ्गो जिल्ला र खास पालिकालाई पूर्णरुपले सिलबन्दी गर्नसक्ने अख्तियारी प्रदेशलाई दिएको र त्यसको लागि सिसिएमसी केन्द्रको समन्वय गर्नुपर्ने उहाँले बताउनुभयो ।
केन्द्रमा रहेका क्वारेन्टिन र होल्डिङ सेन्टरको खानपिनलगायतका व्यवस्थापन गर्ने जिम्मा बैठकले महिला, बालबालिका तथा ज्येष्ठ नागरिक मन्त्रालयलाई दिने निर्णय गरेको छ ।
यो पनि पढ्नुस् :
सुदूरपश्चिम प्रदेशका मुख्य दुई नाकाबाट एकै दिन ७ सय ७६ जना नेपाली स्वदेश भित्रिएका छन् । गड्डाचौकी र गौरीफन्टा नाकाबाट शुक्रबार ७ सय ७६ नेपाली नागरिक नेपाल भित्रिएका हुन् भने १ सय ७८ भारतीय नागरिक बाहिरिएका छन् ।
रोजगारीका लागि भारतका विभिन्न शहर गएका नेपाली जेठ २ गते यता दैनिक नेपाल भित्रिने क्रम जारी रहेको छ । उनीहरू लामो लकडाउनले खानबस्न समस्या भएपछि खुला भएका नाकाबाट नेपाल भित्रिएका हुन् । असार लागेसँगै नेपाली आउने क्रम न्यून हुँदैगएको जनाईएको छ ।
कञ्चनपुरको गड्डाचौकी नाकाबाट ३ सय ४३ नेपाली नागरिक भित्रिएका छन् भने ४२ जना भारतीय नागरिक बाहिरिएको प्रहरीले जनाएको छ । त्यसैगरी, कैलालीको गौरीफन्टा नाकाबाट ४ सय ३३ नेपाली नागरिक भित्रिएका छन् भने १ सय ३६ भारतीय नागरिक बाहिरिएको प्रहरीले जनाएको छ ।
योसँंगै सुदूरपश्चिम प्रदेशमा लकडाउनका समयमा जेठ २ गतेदेखि खुला गरिएका मुख्य नाकाबाट भित्रिने नेपालीको संख्या करिब १ लाख १७ हजार पुगेको छ भने बाहिरिनेको संख्या १७ हजार बढी पुगेको प्रहरीले जनाएको छ ।
नेपाल भित्रिएका उनीहरूलाई विभिन्न जिल्लामाका स्थानीय तहले सञ्चालन गरेको क्वारेन्टाइनमा बस्ने व्यवस्था गरिएको छ ।
कतिपय स्थानीय तहले भारतबाट आउनेको संख्या कम भएसँगै होम क्वारेन्टाइनमा बस्ने गरी नगरपालिकाको क्वारेन्टाइन खाली गर्दैछन् । घोडाघोडी नगरपालिकाले अब आउने नेपालीलाई होम क्वारेन्टाइनमा बस्न सुझाव दिइएको जनाएको छ ।
शुक्रबार नै घोडाघोडी नगरपालिकाले क्वारेन्टाइनमा बसेका ७० जनाको स्वाब सङ्कलन गरी परीक्षणका लागि पठाएकोमा २० जनाको कोरोना पोजिटिभ पुष्टि भएको छ ।