पूर्णपुष्टि÷उदयपुर, असोज ८ । स्थानीय प्रशासनले नियमविपरित सवारी सञ्चालन गरी यात्रुसंग चर्को भाडा असुल्ने र विना टिकट यात्रु बोक्नेलाई कडा कारवाही गर्ने जनाएको छ । स्थानीय प्रशासनले आज सर्बपक्षिय बैंठक बसी सबै क्षेत्रले यसको निगरानी गर्नुपर्ने जनाएको छ ।
त्यस्ता नियम विपरित चलेका सवारी साधनलाई कारवाही हुने र चर्को भाडा लिएर विना टिकट यात्रु चढाएको पाएमा कारवाही हुने जनाएको हो । दशैंको मुुखमा यात्रुसंग जबरजस्ती चर्को भाडा लिने र भनेको ठाउँसम्म नपुर्याउने, धेरै कुराउने र कोचाकोच गरेर क्षमताभन्दा बढि बोकेर सास्ती दिने गरेको पाइएमा कारवाही हुने बताइएको छ ।
चाँडबाडको बेला केही यातायात ब्यवसायीले मौकाको फाइदा उठाउन यस्तो गर्ने गरेको पाइएपछि स्थानीय प्रशासनले कडा कदम चाल्ने भएको हो । रातो नम्बर प्लेटका निजी तथा अन्य मालवाहक सवारी साधनसमेतले चर्को भाडामा यात्रु बोक्ने गरेको गुनासो आएको छ । विना टिकट र क्षमता भन्दा बढि यात्रु बोक्दा यात्रा असुरक्षित र दुर्घटनाको उच्च जोखिम हुने गरेको छ ।
यसै कुरालाई मध्ये नजर गर्दै स्थानीय प्रशासनले कडा अनुगमन गर्ने भएको हो । स्थानीय प्रशासन, यातायात कार्यलय, ट्राफिक कार्यालयले अनुगमन गरी चर्को भाडा असुल्नेलाई कारवाही थालेको छ । बढी भाडा यात्रुलाई नै फिर्ता गराउने काम गरेको छ । निजि नम्बरका साना सवारी साधनले यात्रुलाई महंगो भाडा तिर्न बाध्ये बनाउने र नियम अनुरुप सन्चालनमा रहेको बस ब्यवसायीसमेतलाई असर पर्ने गरी दादागिरी शैलीमा सञ्चालन गर्ने गर्दा ब्यवसायमा असर पर्नुका साथै यात्रुहरु जोखिममा परेको गुनासो आएको छ । यसलाई नियन्त्रण गर्न सबै पक्ष लागिपर्ने जनाइएको छ ।