पूर्णपुष्टि, वैशाख २६ गते ।
स्थानीय तह निर्वाचनमा धनुषा र रुकुम पश्चिममा आफ्नो पार्टीका उम्मेदवारहरुमाथि कुटपिट गरिएको भन्दै राष्ट्रि प्रजातन्त्र पार्टीले आपत्ति जनाएको छ ।
चुवानी प्रचार–प्रसार अभियानमा प्रमुख मोहन श्रेष्ठले सोमवार विज्ञप्ति जारी गर्दै धनुषा जिल्लाको सबैला नगरपालिका–४ का राप्रपाका वडा सदस्ययका उम्मेदवार समशुल राइन मियामाथि नेकपा एमालेबाट सांघातिक हमला भएको भन्दै निन्दा गरेका छन् ।
मियामाथि एमालेले उमेदवारी फिर्ता लिन दबाब दिएको र मियाले पार्टीको पक्षमा दृढतापूर्वक प्रचार गर्ने अडान लिएपछि उनीसहित परिवारका ७ जना सदस्यमाथि सांघातिक हमला भएको विज्ञप्तिमा उल्लेख छ । घटनामा संलग्नलाई पक्राउ गरी कडा कारबाही गर्न र घाइतेको उपचारको लागि प्रबन्ध गर्न राप्रपाले माग गरेको छ ।
यसैगरी रुकुम पश्चिम जिल्लाको मुसिकोट नगरपालिका–१ मा राप्रपाका वडा अध्यक्ष पदका उम्मेदवार लिलिबिर बिसीलाई चुनाव प्रचारका क्रममा माओवादी कार्यकर्ताले बाटो छेकेर धम्क्याउने, पार्टीको झण्डा च्यातेर फालेको र उम्मेदवारलाई लछारपछार गरेकोमा विज्ञप्तिमा भत्सना गरिएको छ ।
यसले जनप्रतिनिधि छनौट गर्ने जनताको अधिकार समेत कुण्ठित भएको भन्दै राप्रपाले सरकार र निर्वाचन आयोगको ध्यानाकर्षण गराएको छ । ‘आफ्नो चुनावी प्रतिबद्धता सहित जनताको घरदैलोमा पुगिरहेका राप्रपाका उमेदवारलाई निरुत्साहित गर्ने, धम्की दिने र आक्रमण गर्ने घटनाले लोकतान्त्रिक अधिकारको उपहास भएको छ । साथै यस्ता घटनाले निर्वाचन मार्फत उपयुक्त दल र उपयुक्त जनप्रतिनिधि छनौट गर्ने जनताको अधिकार समेत कुण्ठित भएको छ,’ विज्ञप्तिमा भनिएको छ, ‘भयरहित निर्वाचनको वातावरण बनाउन राप्रपा सरकार र निर्वाचन आयोगको गम्भीर ध्यानाकर्षण गराउँदछौं ।’
