पूर्णपुष्टि, जेष्ठ १४
बाँके स्थित भेरी अस्पतालमा गएराति स्वास्थ्यकर्मी तथा चिकित्सकलाई हातपात गर्ने ब्यक्ति उपर ज्यान मार्ने उद्योगमा प्रहरीले मुद्धा चलाएको छ ।
स्वास्थ्यकर्मी तथा चिकित्सहरु माथी हातपात भएको भन्दै अस्पतालका सम्पूर्ण स्वास्थ्यकर्मी तथा चिकित्सकहरुले बिरोध जनाएका थिए । बाँकेका प्रमुख जिल्ला अधिकारी शिवराम गेलाल र लुम्बिनी प्रदेशका डीआईजी रवीन्द्र धानुकले सुरक्षाको ‘ग्यारेन्टी’ गरेपछि चिकित्सक र नर्सहरु काममा फर्किएका छन् । अहिले सहमती पश्चात उनिहरु काममा फर्कि सकेका छन् ।
स्वास्थ्यकर्मी कुटपिट तथा हातपात गरेको बिरोधमा आम नागरिक, राजनितिक दल, बुद्धिजिवि, सामाजिक अभियान्त, स्वास्थ्य संगठन, चिकित्सक संघ लगायत बिभिन्न क्षेत्रहरुले चर्को बिरोध गरेका थिए ।
बिहीबार राति कोभिड–१९ संक्रमितको मृत्यु भएपछि आफन्तले कोभिड वार्डमा छिरेर डाक्टर र नर्सलाई आक्रमण गरेका थिए । आक्रमणमा संलग्न दाङको तुलसीपुर घर भएका मानबहादुर रावत, भरत रावत र लोकराज रावतलाई प्रहरीले पक्राउ गरेको छ ।
आरोपीहरु बिरुद्ध ‘ज्यान मार्ने उद्योग’ र ‘आपराधिक उपद्रव’ गरेको कसुरमा मुद्दा दर्ता गरेर अनुसन्धान शुरु गरिएको लुम्बिनी प्रदेश प्रहरी कार्यालयका डीआईजी रवीन्द्र धानुकले जानकारी दिनुभयो । उहाँले भन्नुभयो–‘आक्रमणको नेतृत्व मानबहादुर रावतले गरेको देखिन्छ, बाँके प्रहरीले त्यसबारे थप अनुसन्धान गरिरहेको छ ।’ प्रहरीले उनीहरुको पुरानो आपराधिक तथ्यांक पनि खोजिरहेको छ ।
मृतक ५२ वर्षका पुरुष हुन् । मृतकका भाइ मानबहादुर नेतृत्वको समूह आक्रमणमा उत्रिएपछि चिकित्सक र नर्सले एकतला माथिबाट हामफालेर ज्यान बचाएका थिए । आक्रमणमा संलग्नहरु दाङका तुलसीपुर उपमहानगरपालिका–११ उरहरीका हुन् ।
घटना छानविनका लागी स्थानिय प्रशासनले बाँकेका सहायक प्रमुख जिल्ला अधिकारी शंकरबहादुर विष्टको नेतृत्वमा छानविन समिती गठन गरेको छ । समितिमा ७ जना सदस्य छन् । समितीले ३ दिनभित्र घटनाको सत्यतथ्य पत्ता लगाएर प्रतिवेदन दिनेगरी काम शुरु गरिसकेको छ ।