पूर्णपुष्टि, माघ १८
उदयपुरको चौदण्डीगढी नगरपालिकामा बढ्दै गएको वन विनाशलाई रोक्न एक सामुदायिक वनले उपक्तालाई एलपी ग्यास सिलिण्डर र चुलो वितरण गरेको छ । दाउराको प्रयोग गर्दा दिनदिनै वन जंगल विनाश हुँदै गएको भन्दै जिल्लाको चौदण्डीगढी नगरपालिका–८ सालघारी सामुदायिक वन उपभोक्ता समूहका उपक्तालाई एलपी ग्यास सिलिण्डर वितरण गरिएको हो ।
सामुदायिक वनले ४ लाख खर्चेर ४३ घरधुरी उपभोक्तालाई सिलिण्डर वितरण गरेको समूहका अध्यक्ष चन्द्र कुमार राईले बताउनुभयो । समूहले आर्थिक वर्ष २०७८÷७९ को गरिबी निवारण कार्यक्रम अन्तर्गत समूहभित्र रहेका दलित, एकल महिला र विपन्न गरी ४३ घरधुरी परिवारलाई ग्यास सिलिण्डर र चुलो वितरण गरेको समूहका अध्यक्ष राईले बताउनुभयो । उहाँका अनुसार चालु आर्थिक वर्षको कार्यक्रम अन्तर्गत १४ अतिविपन्न परिवारलाई सिरक पनि वितरण गरिएको छ ।
घरायसी प्रयोजनका लागि दाउरा बाल्न रुख काट्दा वन फँडानी हुँदै आएको भन्दै समूहले कार्ययोजना बनाएर वन विनाश रोक्न लागेको हो । खासगरी गरिब, विपन्न, दलित र एकल महिलालाई वैकल्पिक उर्जा कार्यक्रम अन्तर्गत एलपी ग्यास सिलिण्डर र चुलो वितरण गरिएको हो ।
उपाध्यक्ष गोविन्द ओझाका अनुसार उपभोक्तालाई धुवाँमुक्त बनाउने योजना पनि यसमा समेटिएको छ । सरकारले अघि सारेको ‘धुँवामुक्त अभियान’ लाई सहयोग गर्न पनि ग्यास सिलिण्डर बितरण गरिएको उपाध्यक्ष ओझाले बताउनुभयो । सो सामुदायिक वनमा ३५० उपभोक्ता रहेको छ ।
डिभिजन वन कार्यालय उदयपुरका सहायक वन अधिकृत तथा सूचना अधिकारी जागेश्वर साहका अनुसार उदयपुरमा वन समूहभित्रका एक घरधुरी उपभोक्ताले वार्षिक ३० देखि ३५ भारी दाउरा खपत गर्ने गरेको तथ्यांक निस्केको छ । यसरी उपक्ताले खपत गर्ने दाउन वनबाटै आउने र यही अनुसार दाउरा वन फडानी गर्दै जाने हो भने केही वर्षभित्रै वन सकिने निश्चित छ । त्यसैले विकल्पमा डिभिजन वन कार्यालय गाईघाटले ग्यास सिलिण्डर वितरणको अवधारण ल्याएका हो ।
