पूर्णपुष्टि, माघ १७
उदयपुरमा राष्ट्रिय भूमि आयोगको कार्यालयको सोमवार उद्घाटन भएको छ । उदयपुरको सदरमुकाम गाईघाट स्थित जिल्ला समन्वय समितिको कार्यलय आयोगको कार्यालय स्थापना भएको हो । जिल्ला समन्वय समितिको भवनमा स्थापित कार्यलयको उदघाटन आयोगका केन्द्रीय अध्यक्ष केशव पौडेलले गर्नु भएको हो ।
कार्यलय उदघाटन गर्दै आयोगका अध्यक्ष पौडेलले उदयपुरमा सुकुम्बासी समस्या समाधान , अव्यवस्थित बसोबास र पुराना अधुरो कार्यहरू सम्पन्न गर्दै छोटो समयमा लालपुर्जा वितरण गरेर इतिहास रच्ने दाबी गर्नुभयो । उहाँले माघभित्रै आयोगको खाली सदस्यहरूको पदपूर्ति गरिने दाबीसमेत गर्नु भएको छ । हिजोको आयोगले गरेका सम्पूर्ण कामको अपनत्व ग्रहण गर्ने बताउँदै लालपुर्जा वितरण गर्न ढिलाइ नगर्ने बताउनु भयो ।
समितिमा जिल्लास्थित नापी , मालपोत र बन डिभिजनका सरकारी कार्यलयका प्रमुख पदेन सदस्य रहेको छ । आयोगका जिल्लास्थित कार्यलयको रूपमा यो पहिलो कार्यलय हो ।समितिले उदयपुरको ४ नगरपालिका र ४ गाउँपालिकामा रहेको करिब १५ हजार अव्यवस्थित बसोबास र भूमिहीन सुकुम्बासीहरूलाई जग्गाको स्वामित्व प्रदान गर्ने तयारी गरेको छ ।
जिल्ला अध्यक्ष बलबहादुर तामाङले सुकुम्बासी समस्याको समाधान गर्न समिति कृयाशिल भइरहेको बताउनुभयो । कार्यक्रममा त्रियुगा नगरपालिकाका मेयर बलदेव चौधरीले पुस्तौंदेखि भोग चलन गरेको जग्गाको स्वामित्व नपाएको गुनासो व्यक्त गर्दै एक दुई महिनामै लालपुर्जा वितरण गर्न आग्रह गर्नु भयो ।
त्यसैगरी नेपाली काँग्रेसका भीमचन्द्र राईले आयोगको निरन्तरता दिन अनुरोध गर्नुभयो ।माओवादी केन्द्रका रूद्र अधिकारी वरिष्ठ पत्रकार कौशल चेम्जोङ, प्रमुख जिल्ला अधिकारी बीरेन्द्रकुमार यादवले शुभकामना मन्तव्य राखेका थिए । भुमाफियाहरूले चलखेल गरेको जिल्ला , ४२ वटा भुमि अधिकार मञ्च क्रियाशील छ ।