पूर्णपुष्टि, साउन ३१ । उदयपुरको कटारी नगरपालिकामा हालै सम्पन्न १३औं नगर सभापछि उठेका विवादहरूलाई सम्बोधन गर्न मेयर राजेश चन्द्र श्रेष्ठले बुधबार पत्रकार सम्मेलन गरेका छन्। सामाजिक सञ्जाल र मिडियामा उठेका प्रश्नहरूको जवाफ दिँदै मेयर श्रेष्ठले नगर सभामा पारित भएका निर्णयहरूको वैधानिकता र पारदर्शिताको पक्षमा आफ्नो धारणा राखे।
मेयर श्रेष्ठले नगर सभामा उपमेयर गीता खड्काद्वारा प्रस्तुत आगामी आर्थिक वर्षको नीति, कार्यक्रम र बजेट सर्वसम्मतिले पारित भएको दाबी गरे। उनले गत आर्थिक वर्षको आय-व्यय र आगामी वर्षको बजेटबारे संक्षिप्त जानकारी दिए। साथै, सभापछि उठेका विवादहरूप्रति चिन्ता व्यक्त गर्दै सामाजिक सञ्जालमा फैलिएका अफवाहहरू, विशेषगरी एक करोड ७६ लाख रुपैयाँको खर्चबारे स्पष्टीकरण दिए।
मेयरले कुनै अनियमितता प्रमाणित भए राजनीति छोड्ने चेतावनी दिँदै नगरपालिकाको कामकारबाहीमा पारदर्शिता र जवाफदेहिताको आश्वासन दिए। नगरपालिकाका प्रमुख प्रशासकीय अधिकृत विनोद भट्टराईले पनि सभा सम्पन्न गर्न भएका प्रयासहरूबारे जानकारी दिए। मेयर श्रेष्ठले सबै सरोकारवालाहरूलाई तथ्य र प्रमाणमा आधारित भएर मात्र टिप्पणी गर्न आग्रह गरे। 
