पूर्णपुष्टि, साउन २९ । कोशी प्रदेशका मुख्यमन्त्री हिक्मतकुमार कार्कीले नेपाली कांग्रेसलाई सरकारमा सहभागी गराउन मन्त्रालय विभाजनको तयारी गरेका छन्। हाल ९ वटा रहेका मन्त्रालयलाई बढाएर ११ पुर्याउने योजना रहेको स्रोतहरूले जनाएका छन्। यो कदमले कांग्रेसको आन्तरिक विवाद समाधान गर्न र सरकारमा सहभागिता सुनिश्चित गर्न मद्दत गर्ने अपेक्षा गरिएको छ।
नेपाली कांग्रेस र एमालेबीच पहिले ४-४ मन्त्रालय लिने सहमति भए पनि कांग्रेसको आन्तरिक बाँडफाँटमा विवाद उत्पन्न भएको थियो। संस्थापन पक्ष, डा. शेखर कोइराला र कृष्णप्रसाद सिटौला पक्षबीच मन्त्रालय वितरणमा सहमति जुट्न सकेको थिएन। मन्त्रालय विभाजन गरेर ११ पुर्याउँदा दुवै दलले ५-५ वटा मन्त्रालय पाउने र यसले विवाद समाधान गर्न सहयोग पुग्ने विश्वास गरिएको छ।
मुख्यमन्त्री कार्कीले सार्वजनिक रूपमा मन्त्रालय विभाजनको औपचारिक निर्णय नभएको बताए पनि अनौपचारिक छलफल भइरहेको जनाइएको छ। कांग्रेस प्रदेश संसदीय दलका प्रमुख सचेतक गोपाल तामाङले पनि अनौपचारिक रूपमा मन्त्रालय थप्ने कुरा चलिरहेको पुष्टि गरेका छन्।
तर यो प्रस्तावले विरोध पनि निम्त्याएको छ। माओवादी केन्द्रले मन्त्रालय विभाजनको विरोध गरेको छ, यसले संघीयताको मर्म विपरीत हुने र दीर्घकालीन दायित्व सिर्जना गर्ने चेतावनी दिएको छ। माओवादी केन्द्र संसदीय दलका नेता इन्द्रबहादुर आङ्बोले भागबन्डाको नाममा संघीयताको हुर्मत लिने र संघीय व्यवस्थालाई बदनाम गर्ने कार्य तत्काल रोक्न आग्रह गरेका छन्।