पूर्णपुष्टि, साउन २८
नवजात शिशुको हत्या गरि फरार रहेका एक अभियुक्तलाई तनहुँ प्रहरीले १८ वर्षपछि पक्राउ गरेको छ । तनहुँ आबुखैरेनी गाउँपालिका–१ का ५१ वर्षीय प्रेमबहादुर सार्कीलाई शिशुको हत्या अभियोगमा पक्राउ गरेको हो ।
उनलाई बुधबार पक्राउ गरिएको तनहुँका प्रहरी उपरीक्षक दिनेश मैनालीले बताए । २०६० साल वैशाख ११ गते उनलाई अदालतले कर्तव्य ज्यानमुद्दामा जन्मकैद सजाय सुनाएको थियो । २०६० कात्तिक १८ गते तत्कालीन पुनरावेदन अदालत पोखराले पनि जिल्लाकै आदेश सदर गरेको थियो ।
उनलाई अदालत पेश गरिएकोमा अदालतले कारागार चलान गरेको प्रहरी उपरीक्षक मैनालीले बताए ।
नवजात शिशुको हत्या गरेको अभियोग सार्कीमाथि थियो । जबरजस्ती करणीबाट एक महिलाले गर्भाधारण गरेपछि उनले औषधी खुवाएर गर्भपतन गराई घटना लुकाउन खोजेका थिए ।
तर, छोरी जिउँदै जन्मेपछि सार्कीले खर बारीमा लगेर हत्या गरेको आरोप थियो । आरोप पुष्टि भएपछि अदालतले उनलाई जन्मकैद सजाय सुनाएको थियो ।
त्यतिबेलै प्रहरीले महिलालाई भने पक्राउ गरेको थियो । उनको बयानबाट घटनाको रहस्य सार्वजनिक भएपछि सार्कीलाई अदालतले दोषी ठह¥याएको थियो ।