पूर्णपुष्टि, असार १७ । उदयपुरको गाईघाट बजार नजिकैको बरुवा खोलामा वर्षायाममा आउने बाढीसँगै बगेर आएका दाउरा र काठ संकलन गर्न स्थानीयहरू जोखिम मोल्न बाध्य भएका छन्।
बर्षेनि देखिने यो दृश्यमा बालबालिकादेखि वृद्धवृद्धासम्म बाढीको जोखिम मोलेर दाउरा र काठ निकाल्न तम्सिएका देखिन्छन् । स्थानीयहरूका अनुसार जंगलबाट दाउरा ल्याउन दिनभर लाग्ने भएकाले बाढीले बगाएर ल्याएको दाउरा संकलन गर्नु सजिलो विकल्प बनेको छ ।‘बाढीमा दाउरा निकाल्दा जोखिम त छ, तर घरमा चुलो बाल्न यो नै सजिलो उपाय हो, ‘एक स्थानीय महिलाले भनिन् । यद्यपि, यो प्रक्रिया निकै खतरापूर्ण छ। बाढीको बहावमा बग्न सक्ने र डुब्ने जोखिम उच्च रहन्छ ।
स्थानीय प्रशासनले बारम्बार सचेत गराउँदा पनि आर्थिक विवशताका कारण स्थानीयहरू यस्तो जोखिम मोल्न बाध्य भएको देखिन्छ। स्थानीय प्रहरी चौकीका एक अधिकारीले भने, ‘हामी सकेसम्म सुरक्षित तरिकाले दाउरा संकलन गर्न सुझाव दिन्छौं, तर जनचेतना र वैकल्पिक व्यवस्था नभएसम्म यो समस्या रहिरहने देखिन्छ। यस घटनाले एकातिर स्थानीयको ईन्धन आवश्यकता र अर्कोतिर सुरक्षाको चुनौती बीचको द्वन्द्व देखाउँछ। दीर्घकालीन समाधानका लागि वैकल्पिक ईन्धन स्रोतको व्यवस्था र जोखिम न्यूनीकरणका उपायहरू अवलम्बन गर्नुपर्ने आवश्यकता देखिएको छ।