पूर्णपुष्टि, कार्तिक ७ । त्रियुगा नगरपालिका वडा नं. ४ बगाहामा जारी दोस्रो स्व. युवराज (कौलाश) राई फुटबल प्रतियोगिताको फाईनलमा सगरमाथा फुटबल क्लब (राजावास) पुगेको छ । बुधबार बगाहाको खेल मैदानमा भएको पहिलो सेमिफाईनल खेलमा बेल्टार एकता युवा क्लबलाई पेनाल्टी सुटआउटमा २–४ गोल अन्तरले हराउँदै राजावास फाईनलमा प्रवेश गरेको हो ।
निर्धारित समयमा गोल रहित बराबरी भएपछि खेलको निर्णय पेनाल्टी सुटआउट बाट लिइएको हो । सगरमाथाका लागी जर्सि नं. ११ का निश्चल मोक्तान, जर्सि नं. ८ का देवराज चौधरी, जर्सि नं. ७ का सनिष लिम्बु र जर्सि नं. ३ का रमेश राजवंशीले गोल गरे । त्यस्तै बेल्टारका लागी जर्सि नं. १३ का सागर राई र जर्सि नं. ९ का विश्वास राईले गोल गरे भने जर्सि नं. ११ का कप्तान सरद राई र जर्सि नं. ४ का मनिक राईको प्रहार गोल रक्षकले रोकेका थिए ।
यस खेलको म्यान अफ द म्याच सगरमाथा फुटबल क्लबका जर्सि नंं २० का गोल रक्षक निश्चल कार्की बने । उनले नगद रु. १ हजार सहित फ्लेक्स र मेडल प्राप्त गरे । भोली (बिहिबार) दमौटी फुटबल क्लब र फ्युजन फुटबल क्लब बिच दोस्रो सेमिफाईनल खेल हुनेछ । यस प्रतियोगिताको विजेताले नगद रु. ५१ हजार र उपविजेताले ३१ हजार सहित ट्रफी र मेडल प्राप्त गर्नेछ । स्व। कैलाश राई युवा फुटबल खेलाडीहरुमाझ लोकप्रिय थिए । फुटवलमा रुची राख्ने राईको कामको शिलशिलामा करेन्ट लागी मृत्यु भएको थियो । कार्यक्षेत्रमा करेन्ट लागेर मृत्यु भएपछि उनको सम्झनामा गत वर्षदेखि यो प्रतियोगिता आयोजना गरिँदै आएको छ ।
