पूर्णपुष्टि, असोज ७ । मेडिकल व्यवसायी दुर्गा प्रसाईंको पक्राउपछि उनका समर्थकहरूले झापामा तीन वटा भारतीय नम्बर प्लेटका ट्रकमा आगजनी गरेका छन्। आइतबार बी एन्ड सी अस्पतालका सञ्चालक प्रसाईंलाई प्रहरीले पक्राउ गरेपछि यो घटना भएको हो।
कोशी प्रदेश प्रहरी प्रवक्ता भीमबहादुर दाहालका अनुसार, आगजनीका घटनाहरू आइतबार राति र सोमबार बिहान छुट्टाछुट्टै स्थानमा भएका थिए। पहिलो घटना आइतबार राति कन्काइ नगरपालिका-८ स्थित बिरिङ खोलाको पुलमा यूपी-५७ एटी-४४९३ नम्बरको मालबाहक ट्रकमा भएको थियो। त्यसपछि सोमबार बिहान बिर्तामोड नगरपालिका-६ मा डब्लूबी-७३-ई-३०५७ नम्बरको खाली ट्रकमा आगो लगाइएको थियो। अन्तिम घटना झापाको धाइजनमा डब्लूबी-७३-ई-३०५६ नम्बरको भारतीय ट्रकमा भएको थियो।
प्रसाईंका समर्थकहरूले सोमबार झापामा चक्काजामको घोषणा गरे पनि सवारी आवागमनको अवस्था सामान्य रहेको प्रहरीले जनाएको छ। प्रहरीले आगजनीमा संलग्न व्यक्तिहरूको खोजी गरिरहेको बताएको छ। तीनवटै ट्रकमा क्षति पुगेको छ। यी घटनाहरू पूर्व-पश्चिम राजमार्गको विभिन्न स्थानमा भएका हुन्।