पूर्णपुष्टि, असार २२ । मधेश प्रदेशका मुख्यमन्त्री सतिशकुमार सिंहले शनिबार विश्वासको मत लिनु अघि चार दलका ६ मन्त्रीलाई बर्खास्त गरेका छन्। बर्खास्त हुनेमा माओवादी केन्द्र, नेकपा एकीकृत समाजवादी, नागरिक उन्मुक्ति पार्टी र नेपाल संघीय समाजवादी पार्टीका मन्त्रीहरु रहेका छन्।
बर्खास्त गरिएका मन्त्रीहरुमा:
- अर्थमन्त्री भरतप्रसाद साह (माओवादी केन्द्र)
- उद्योग, वाणिज्य तथा पर्यटनमन्त्री युवराज भट्टराई (माओवादी केन्द्र)
- भूमि व्यवस्था कृषि तथा सहकारी मन्त्री गोबिन्द बहादुर न्यौपाने (एकीकृत समाजवादी)
- उर्जा, सिँचाई तथा खानेपानी मन्त्री बेची लुंगेली (एकीकृत समाजवादी)
- श्रम तथा यातायात मन्त्री उर्मिलादेवी सिंह चौधरी (नागरिक उन्मुक्ति पार्टी)
- गृह, संचार तथा कानुनमन्त्री बिमला अन्सारी (संघीय समाजवादी पार्टी)
मुख्यमन्त्री सिंहले एमालेका चार मन्त्री र जनमतका एक मन्त्रीलाई भने यथावत राखेका छन्। यो कदम केन्द्रमा नेपाली कांग्रेस र नेकपा एमालेबीच भएको नयाँ समिकरणसँग जोडिएको बताइएको छ। मुख्यमन्त्री सिंहले शनिबार विश्वासको मत लिने र त्यसपछि आइतबार कांग्रेस र लोसपालाई सरकारमा सहभागी गराउने तयारी गरेका छन्। कांग्रेसले मुख्यमन्त्री सिंहलाई विश्वासको मत दिने जनाइएको छ। यो घटनाक्रमले मधेश प्रदेशको राजनीतिक परिदृश्यमा नयाँ मोड ल्याएको छ र आगामी दिनमा थप राजनीतिक गतिविधिहरु हुने अपेक्षा गरिएको छ।