पूर्णपुष्टि, मंसिर १६
लिम्चुङबुङमा जनप्रतिनिधिलाई खरिद गर्ने चारपांग्रे सवारी साधनको पैसाले सर्बसाधारणको लागि बस खरिद गरिएको छ । स्थानीय सरकार लिम्चुङबुङ गाउँपालिकाले उदयपुरको दुर्गम क्षेत्रमा यातायात सेवा सुरु गरेको हो । बस खरिद गरी पालिकाबासी र आसपासका दुर्गम क्षेत्रका नागरिकहरुका लागि यातायात सेवा सुरु गरेको पालिकाका अध्यक्ष मेजरकुमार राईले बताउनुभयो । सर्बसाधारणको हितमा थालिएको यातायात सेवा सुलब गरिएको छ । अध्यक्ष राईले भन्नुभयो –“जनप्रतिनिधि गाडी चढ्ने भन्दा पहिले जनताको सुविधालाई प्राथमिकता दिइएको छ ।”
यातायात सेवाका लागि पालिका आफैले खरिद गरेको एउटा बस हिजोबाट सञ्चालनमा आएको छ । पालिकाको सदरमुकाम बराहास्थित राईचौकदेखि जिल्ला सदरमुकाम गाईघाटसम्मको यात्राका लागि सेवा सुरु भएको हो । लिम्चुङबुङबाट गाईघाट ६५ किलोमिटर कच्ची सडक दुरी छ ।
प्रमुख प्रशासकीय अधिकृत टार्जन लिम्बुका अनुसार बृद्धबृद्धा, अशक्त, अपाङ्ता भएकाहरुका लागि ५० प्रतिशत भाडा छुट छ । कृषक, उद्यमीहरुका लागि उत्पादन निर्यात तथा कच्चापदार्थ आर्यतमा २५ प्रतिशत छुट छ भने विद्यार्थीका लागि १० प्रतिशत छुट छ । पालिकाले लिम्चुङबुङ–गाईघाटका लागि ६०० रुपैया भाडादर तोकेको छ ।
चारवर्षअघि स्थानीय तहको निर्वाचनमा गाउँगाउँमा भोट माग्न जाँदा पैदल हिडेको कुरालाई स्मरण गर्दै त्यहाँका जनप्रतिनिधिहरुले पालिकाबासीलाई बस चढाउने निधो गरेका थिए । सोही अनुरुप पाँचै वडामा ठूलो बस पुग्ने सडक विस्तार भइसकेको छ । सडक विस्तारसंगै साना तथा ठूला बस लगायतका सवारी साधन चल्न थालेका भएपनि निम्नबर्गको पहँुच पुगेको छैन । विशेषगरी निम्नबर्गलाई सुलभरुपले सेवा प्रदान गर्न यातायात सञ्चालन गरिएको लेखा अधिकृत ताराकिरण राईको भनाई छ ।
पालिकाले यातायात सेवा सञ्चालन जिल्ला मात्र नभइ प्रदेशकै पहिलो अभ्यास हुनसक्छ । यसबाट पालिकाबासी सर्बसाधारणलाई आवतजावत मात्र नभइ कृषक, उद्यमीसममेतलाई टेवा पुग्ने गरी सेवा सञ्चालन गरिएको पालिकाकी उपाध्यक्ष रमिला राईले बताउनुभयो । उहाँका अनुसार पालिकाका अध्यक्ष, उपाध्यक्ष, प्रमुख प्रशासकीय अधिकृत लगायत सबै जनप्रतिनिधि तथा कर्मचारीहरु मोटरसाईकल चलाउँछन् ।
पालिकाले आफुहरुको लागि यातायात सेवा सञ्चालन गरेकोमा पालिकाबासीले खुसी ब्यक्त गरेका छन् । पालिकाबासीको आवश्यकता अनुरुप बस सञ्चालन भएको स्थानीय गञ्जु शेर्पाले बताउनुभयो । यातायात सेवाको निरन्तरता र ब्यवस्थापन चुनौतीपूर्ण हुनेमा पालिकाबासी चिन्तित छन् । सेवा नियमित र निरन्तर हुनुपर्ने मत उनीहरुको छ । स्थानीय हर्क राईले थप एउटा बस किन्न आवश्यक देखिएको बताउनुभयो । पालिकाको दुईवटा बस हुँदा एकैदिन जान, आउन सुविधा मिल्ने उहाँको भनाई छ ।